وەرگرتنی قوتابی و خوێندکار لە خوێندنى باڵا

بۆ خوێندنی دیپلۆمی باڵای یەک ساڵەی ئەکادیمی، تێکراى نمرە (معدل)ى بەکالۆریۆسى پێشکەشکار رەچاو ناکرێت بۆ پێشکەشکردن. هەر پێشکەشکارێک تێکراى نمرە (معدل)ى (٥٠%) بێت، مافى هەیە پێشکەشى ئەم جۆرە خوێندنە بکات.

بۆ خوێندنی (ماستەر) پێوستە خوازیار هەڵگرى بروانامەى بەکالۆریۆس بێت و کۆنمرەی لە (٦٠) کەمتر نەبێت، جگە لە دەرچووانی کۆلێژە پزیشکییەکان و هەڵگری نازناوی زانستی هەمیشەیی لە وەزارەتی خوێندنی باڵا و توێژینەوەی زانستی و وەزارەتی پەروەردە.

ئەو پێشکەشکارانەی تێکرای نمره (معدل)ی به كالۆريۆسيان له (٦٠) کەمتره، مەرجه سەرەتا دبلۆمی باڵای یه ک ساڵەی ئەکادیمی له زانکو حکومییەکانی هەرێمی کوردستان بخوێنن، دواتر مافیان هەیه پێشکەشی خویندنی باڵا (ماستەر) بکەن، بەشێوەیەک که ڕێژەی (٦٠)ی نمره له سه ر کونمرەی بڕوانامەی دبلۆمی باڵای یەك ساڵەی ئەکادیمی دەبێت و رێژەی(٤٠)ی نمره له سه رکۆنمرەی بڕوانامەی بەکالۆريۆس دەبێت.

بۆ خوێندنی (دکتۆرا) پێوستە خوازیار کۆنمرەی بروانامەى ماستەرەکەی لە (٦٠) کەمتر نەبێت.

ئەگەر خوازیار فەرمانبەری کەرتی گشتی بێت، پێوستە لاری نەبوونی فەرمانگەکەی هەبێت.

پێویستە خوازیار لە تاقیکردنەوەى توانستى زانستى دەربچێت و به‌ لایه‌نی كه‌م (١٥) نمرەی لە (٣٠) نمرەى تەرخانکراو بۆ تاقیکردنەوە بەدەست بهێنێت.

بۆ خوێندنی دیپلۆمی باڵای یەک ساڵەی ئەکادیمی، میچ (سقف)ى تەمەن رەچاو ناکرێت بۆ مەبەستی پێشکەشکردن لەبەرئەوەی خوێندنەکە بە شێوەى پارالێل دەبێت.

بۆ خوێندنی ماستەر، مەرجە تەمەنى خوازیارى دامەزراو )فەرمانبەرى هەمیشەیی (لە دامودەزگا حكومییەکانى هەرێمی کوردستان و عێراق لە (45) چل و پێنچ ساڵ زیاتر نەبێت. ئەگەر تەمەنی له‌ سه‌رووی (45 ساڵ) چل و پێنچ ساڵ بێت، ئەوا ده‌توانێت به‌ شێوازی پارالێل پێشكه‌ش بكات.

بۆ خوێندنی دکتۆرا، مەرجە تەمەنى خوازیارى دامەزراو )فەرمانبەرى هەمیشەیی (له‌ دامودەزگا حكومییەکانى هەرێم و عێراق لە (٥٠) پەنجا ساڵ زیاتر نەبێت. ئەگەر تەمەنی له‌ سه‌رووی (٥٠) پەنجا ساڵ بێت ،ئەوا ده‌توانێت به‌ شێوازی پارالێل پێشكه‌ش بكات.

بۆ خوازیارانى دانەمەزراو، رەچاوى میچ (سقف)ى تەمەن ناكرێت بۆ مەبەستی پێشکەشکردن بۆ خویندنی ماستەر و دکتۆرا.

بۆ خوازیارانى دامەزراو )فەرمانبەرى هەمیشەیی (له‌ دامودەزگا حكومییەکانی هەرێمی کوردستان و عێراق، مەرجی ساڵانی خزمەت بە پێی یاسا و پەیڕەو و رێنماییە کارپێکراوەکان لە هەرێمی کوردستان دەبێت.

بۆ خوازیارانى دانەمەزراو لە یەکێک له‌ دامودەزگا حكومییەکانی هەرێمی کوردستان و عێراق، به ‌بێ هه‌بوونی مه‌رجی ساڵانی ده‌رچوون و تێپه‌ڕین به‌سه‌ر به‌ده‌ستهێنانی دوا بڕوانامه، راسته‌وخۆ ‌مافی پێشكه‌شكردنیان هه‌یه‌ و بۆ ئەم مەبەستەش خوازیاران پێویستە بەڵێننامەى فەرمی یاسایى لە سەرۆکایەتى زانکۆکان پێشکەش بکەن کە لە هیچ دامودەزگایەکى حكومی لە هەرێمى کوردستان و عێراق دانەمەزراون، لە حاڵەتى پێشکەشکردنى زانیارى نادروست، قوتابى/خوێندکار راستەخۆ فەرمانی سڕینەوەی ناوی (ترقين قيد)ی بۆ دەردەکرێت و رێکارى یاسایی بەرامبەر دەگیردرێتە بەر.

خوازیارانی دەرەوەی هەرێمی کوردستان و دەرەوەی عێراق مافى پێشکەشکردنى هەیە بە سیستمى پاراڵێل به‌ هه‌مان مه‌رج و پێوه‌ره‌كانی هاتوو له‌م رێنماییە.

رێکخستنى پێشبڕکێی وەرگرتن و پێوەرەکانى سیستمى ڕیزبەندى بەپێى ڕێژەى خاڵ دەبێت.

مەرجی توانستی زمانی ئینگلیزی لەکاتی پرۆسەی پێشکەشکردن لە رێنمایی ساڵانەی خوێندنی باڵا هاوپێچ کراو ڕوونکراوەتەوە.